„Skjólið“ í ESB
Fyrri umræðu um þingsályktun ríkisstjórnarinnar um áframhaldandi aðlögunarviðræður við ESB lauk á mánudaginn, hún hafði þá veri í gangi á þremur þingfundum.
Þáttaka stjórnarliða minnkaði áberandi mikið á milli þess sem málið var rætt fyrstu tvo dagana yfir á þann þriðja. Þá höfðu stjórnarliðar áttað sig á að viðspyrnan við blekkingarleiknum var meiri en þeir höfuð gert ráð fyrir.
Ríkisstjórnin hafði þá sett nýtt Reykjavíkurmet í sjálfspeppi, eftir að hafa sleppt því að setja þingsályktun um ESB í samráðsgátt stjórnvalda, sleppt því að ræða og kynna málið fyrir utanríkismálanefnd, lögbundið sem það er, sleppt því að nefna málið í þingmálaskrá og áfram mætti telja.
Enda mættu stjórnarliðar glaðbeittir til umræðunnar á mánudag í síðustu viku og ýfðu fjaðrirnar. „Við treystum þjóðinni“, „þjóðin veit sínu viti“, „af hverju má almenningur ekki sjá hvað er í boði?“ þetta og fleiri frasar buldu á áhorfendum Alþingisrásarinnar sem heima sáttu og skildu ekkert í þessu fólki sem taldi sig hafa fundið hina endanlegu lausn á vandamálum lands og þjóðar. Bjölluat í Brussel.
Þeir sem heima sátu horfðu þarna á fólki sem virtist sannfært um að best væri fyrir Ísland og íslenska hagsmuni að hefjast nú þegar handa við að innleiða galla ESB, eftir að hafa í 30 ár horft til þess að nýta kostina í gegnum aðildina að EES samningnum.
En hvers vegna núna, hvers vegna kemur málið svona hratt inn, leiftursókn mætti kalla þetta.
Getur verið að yfirgripsmikið getuleysi stjórnvalda við að leysa hin raunverulegu vandamál sem við er að glíma sé ástæða þess að menn leita í „skjól“ af ESB umræðunni?
Ríkisstjórnin leitaði í skjól umræðu um veiðigjöld á síðasta þingi, þegar þrengdi að vegna innanmeina hennar.
Hún gæti ekki orðið mikið verri fyrir stjórnarflokkana umræðan um ESB en umræðan um vexti, verðbólgu, verðbólguvæntingar, ríkisútgjöldin linnulaus, árásirnar á atvinnulífið; sjávarútveginn, landbúnaðinn, orkuframleiðsluna og ferðaþjónustuna og áfram mætti telja.
Samt þótti þeim umræðan of mikil. Hættu að taka þátt í henni. Svöruðu engu. Reyndu það raunar fæst.
Var samt bara verið að gagnrýna hluti sem blasa við og varða villandi texta þingsályktunar og þunnildið sem greinargerðin er.
Við stjórnarliða er á þessum tímapunkti rétt að segja; það verður ekkert skjól í ESB umræðunni.
Landsmenn allir og við í stjórnarandstöðunni munum ekki hlíða – við munum kíkja í galopinn ESB pakkann fyrir atkvæðagreiðsluna en ekki eftir hana.
Bergþór Ólason, alþingismaður.
Pistillinn birtist fyrst í Morgunblaðinu 18. mars, 2026.
