Umhverfis – og loftslagsmál

Miðflokkurinn hafnar öllu ofstæki og hræðsluáróðri í tengslum við umræðu um umhverfis- og loftslagsmál.

Í umhverfis- og loftslagsmálum þarf að taka tillit til sérstöðu Íslands og framlag landsins í heildaráhrifum á heimsvísu. Stefna Íslands á að taka tillit til heildaráhrifa og ákvarðanir ríkisvaldsins að taka mið af því.

Miðflokkurinn leggur áherslu á áframhaldandi nýtingu umhverfisvænnar orku landsins í orkufrekum iðnaði enda slíkt mikilvægt framlag landsins til loftslagsmála heimsins.

Miðflokkurinn vill nálgast loftslagsmál eins og önnur með skynsemina að vopni og leggja til lausnir sem stuðla að bættu umhverfi fólks og fyrirtækja án íþyngjandi gjalda.

Miðflokkurinn leggur áherslu á hreint og heilbrigt umhverfi sem er forsenda fyrir matvælaframleiðslu í landinu.

Miðflokkurinn leggur áherslu á umhverfisvæna orkunýtingu sorps. Með því að brenna sorpi í hátæknibrennslustöðvum er sorpinu breytt í nýtanlega orku, raforku og hitaorku. Þá skila nýjustu hátæknisorpbrennslustöðvarnar tiltölulega lítilli loftmengun, langt innan þeirra marka sem leyfileg eru. Aðgerðin á að tryggja að minna land fari til spillis og grunnvatn mengist síður.

Miðflokkurinn vill endurskoða aðild Íslands að samfloti með Evrópusambandinu í tengslum við loftslagsmarkmið.

Skoða þarf aðkomu Íslands að ETS-losunarkerfinu (Evrópska viðskiptakerfið með losunarheimildir) sem er landinu mótdrægt enda ekki tekið tillit til stöðu landsins sem eyju sem er algjörlega háð flug- og skipaflutningum. Núverandi fyrirkomulag bitnar á Íslandi þar sem vöruverð mun hækka og ferðakostnaður landsmanna sömuleiðis. Hreinsun og meðhöndlun úrgangs og skólps verði sett í forgang enda mikilvægt fyrir stöðu Íslands sem matvælaframleiðslulands.

Setja verður stefnu til framtíðar um orkuskipti í samgöngum sem byggir á raunsæjum skrefum, m.a. varðandi uppbyggingu innviða, orkuverð og aðgang að umhverfisvænum orkugjöfum. Leggja skal áherslu á jákvæða hvata fremur en neikvæða í þessum tilgangi. Orkuskipti þjóðarinnar munu ekki fara fram í náinni framtíð nema með verulega aukinni nýtingu endurnýjanlegrar grænnar orku svo sem jarðvarma og virkjun fallvatna.