Komum böndum á stjórnleysið á landamærunum

Alger viðhorfsbreyting hefur orðið víða í Evrópu og þess sér einnig merki hér á landi í þá átt
að landamæri skulu vera örugg og við ráðum því hverjir koma hingað til lands. Fyrir þessu
hefur Miðflokkurinn lengi talað fyrir daufum eyrum. Nýverið hafa sumir aðrir flokkar tekið
upp sum þessara sjónarmiða okkar, en eftir reynsluna er þessum flokkum ekki treystandi í
málefnum öryggis og landamæra. Ráðaleysi undanfarinna ára hefur kostað skattgreiðendur yfir 25 milljarða á ári í bein útgjöld og er þá ótalinn óbeinn kostnaður og tilheyrandi álag á
skóla, heilbrigðisstofnanir og aðra innviði.

Að undanförnu hef ég átt þess kost að hitta margt fólk á Suðurnesjum. Þrátt fyrir ólíkar
áherslur, þá er eitt mál sem flestir nefna þegar spurt er um helsta áhyggjuefnið, það eru
vandamál tengd hælisleitendum á svæðinu.

Margir á stjórnmálavettvangi reyna að komast hjá umræðu um málið og setja alla útlendinga
undir sama hatt. Staðreyndin er sú að yfir 400 milljónir manna hafa frjálsa för hingað til lands
innan EES svæðisins og koma margir hingað til starfa á grundvelli EES samningsins.
Vandamálin hafa minnst með það fólk að gera, þó mikið sé óunnið í því hjálpa því fólki að
aðlagast íslenskri menningu og samfélagi, m.a. með íslenskukennslu.

Vandamálin eru tengd tilhæfulausum umsóknum um hæli hérlendis, með tilheyrandi
fjáraustri úr ríkissjóði. Í tíð síðustu ríkisstjórnar stóðu landamæri landsins galopin og hingað
streymdi fólk sem hafði komið inn á Schengensvæðið suður í Evrópu. Okkur ber engin skylda
til að taka við fólki sem á umsókn afgreidda eða óafgreidda í öðru landi innan svæðisins. Innri
landamærin hafa staðið galopin og því vill Miðflokkurinn breyta.

Við þurfum að læra af öðrum þjóðum í málefnum útlendinga. Margir forystumenn í
stjórnmálum á Norðurlöndunum viðurkenna nú að stefna þjóða þeirra voru mistök til
áratuga. Stefna danskra stjórnvalda er að taka ekki við einum hælisleitanda sem sækir um á
danskri grundu. Gerum ekki sömu mistökin og gerð voru í Skandinavíu.

Fjölmörg úrræði bjóðast til að vinna að því að verja landamærin. Unnt er að taka upp
landamæraeftirlit á innri landamærunum, það hafa fjölmargar þjóðir í Evrópu gert til
skemmri eða lengri tíma. Taka má upp áritunarskyldu gagnvart einstökum löndum og í því
sambandi taka mið af straumi afbrotamanna frá einstökum svæðum. Það er auðvitað ófært
að hér geti starfað 15 glæpaklíkur óáreittar árum saman án aðgerða af hálfu stjórnvalda.
Þessa hópa þarf að greina og leysa upp, afturkalla dvalarleyfi ef um erlenda aðila er að ræða
og brottvísa af landinu.

Stefna Miðflokksins er að enginn eigi að koma til Íslands í leit að hæli. Efla þarf löggæslu á
landamærum og flýta fyrir brottvísun þeirra sem fyrir liggur að hér fá ekki hæli. Við eigum að
bjóða fólki í neyð til landsins og hjálpa því að aðlagast íslenskri menningu og samfélagi. Það
fólk eigum við að velja gaumgæfulega í samvinnu við alþjóðastofnanir. Við eigum líka að
hjálpa fólki í neyð nær þeirra heimaslóðum. Þar nýtist hver króna a.m.k. tífalt betur en hér á
landi. Þannig hjálpum við fleirum.

Við ætlum að koma böndum á stjórnleysið á landamærunum og skrifa ný útlendingalög frá
grunni. Fullveldi án öruggra landamæra er markleysa.

Höfundur er lögreglustjóri og oddviti Miðflokksins í Suðurkjördæmi.