Eldhúsdagsumræður 2025 – Ingibjörg Davíðsdóttir
Herra forseti. Góðir landsmenn. Nú fer að hilla undir þinglok eftir allsérstakan þingvetur sem er raunar minn fyrsti. Skynsemin er fjarri góðu gamni við ríkisstjórnarborðið, allt gert fyrir skammvinnar vinsældir. Mál hafa skilað sér seint og illa inn í þingið. Ósamstaða og skattagleði hafa einkennt störf ríkisstjórnar Flokks fólksins, Samfylkingar og Viðreisnar. En það er fólkið í landinu sem borgar á endanum og það er sárt að vita til þess. Það virðist skipta ríkisstjórnina engu ábendingar um staðreyndir, greiningar eða tölulegar upplýsingar varðandi áhrif gríðarlegra skattahækkana, t.d. á grunnatvinnuveg þjóðarinnar, sjávarútveginn. Það er enginn að hlusta í meiri hlutanum, nákvæmlega enginn, ekki einu sinni þeir sem hafa fátt annað að segja í þingsal en að þeir séu að hlusta, þeir eru ekki einu sinni að hlusta. Málið kýlt áfram í óþökk allra nema auðvitað bestu vina aðal. Málið fékk minni tíma í samráði heldur en breytingin á lottókúlunum. Mikill samhljómur hefur verið meðal gesta úr öllum áttum sem koma fyrir þingnefnd og fjalla um málið, mál sem heggur af hörku úti á landi. Tímaramminn er gerræðislegur og áhrifin grafalvarleg fyrir sjávarútvegsamfélög um landið. Verkefnið er að auka verðmætasköpun í sjávarútvegi, stækka skattsporið sem í dag hallar í 100 milljarða á ári.
En skattagleði ríkisstjórnarinnar nær líka til ferðaþjónustunnar. Ráðast á að annarri undirstöðuatvinnugrein sem nú þegar berst í bökkum eftir erfiða tíma. Komugjöld, auðlindagjöld og svo mætti lengi telja, allt óútfært en afleiðingarnar þekktar. Áfram skal dregið úr þrótti atvinnulífs og vegið að velferð vinnandi fólks á Íslandi.
Kæru landsmenn. Þessi ríkisstjórn stendur ekki með landsbyggðinni, hún stendur hvorki með bændum, sjávarbyggðum né íslenskum iðnaði. Innlend matvælaframleiðsla á undir högg að sækja hjá þessari ríkisstjórn en til stendur að veikja stöðu bænda enn frekar með breytingu á búvörulögum. Fjölskyldubíllinn, landflutningar og landbúnaður fá sko aldeilis fyrir ferðina en bæði stendur til að leggja á sérstakt kílómetragjald og hækka kolefnisgjaldið. Landamærin hriplek og vega að íslenskri velferð á hverjum degi, útlendingamálin í ólestri og engin alvörubragarbót í sjónmáli. Fullveldið fær ekki einu sinni að vera í friði. Fullveldi Íslands fær ekki einu sinni að vera í friði en til stendur að tefla því í tvísýnu á kjörtímabilinu, fyrst með bókun 35 og síðar með atkvæðagreiðslu um áframhaldandi aðlögunarviðræður að Evrópusambandinu. Það er ekki eitt heldur allt.
En það munar um Miðflokkinn hér á Alþingi. Við stöndum vörð um fullveldið, fólkið, fyrirtækin og framtíð Íslands. Við viljum lækka skatta, auka svigrúm fyrirtækja til fjárfestinga, auka verðmætasköpun, koma í veg fyrir samþjöppun í sjávarútvegi, efla bændur og innlenda matvælaframleiðslu. Við viljum lækka álögur á fólk og fyrirtæki á landsbyggðinni, koma böndum á útlendingamálin og landamærin og tryggja þannig öryggi borgaranna. Við viljum skrifa ný útlendingalög og verja íslenska velferð. Heilbrigð skynsemi og þrautseigja við stjórn landsmálanna borgar sig, eins og fyrir tíu árum þegar ríkisstjórn Sigmundar Davíðs Gunnlaugssonar tryggði stærsta einstaka efnahagslega sigur í sögu Íslands í kjölfar bankahrunsins eftir erfiðan slag við slitabú föllnu bankanna. Árangur sem íslensk þjóð býr enn að þrátt fyrir allt. Hverfum af braut skattagleði, óráðsíu, ósamstöðu og orðagjálfurs og fylkjum liði við styrka stefnu Miðflokksins. Við erum ekki froðusnakkarar. Við gerum einfaldlega það sem við segjumst ætla að gera. — Góðar stundir.
Ingibjörg Davíðsdóttir, oddviti Miðflokksins í Norðvesturkördæmi.
