Ríkistjórnin hangir á grásleppu-þræði
Fulltrúar Viðreisnar, Samfylkingar og auðvitað Flokks fólksins í atvinnuveganefnd sýndu aftur og sönnuðu í gær að fagleg meðferð skiptir engu þegar kemur að því að þvinga í gegn mál sem þjóna sérhagsmunum Flokks fólksins – allt á kostnað almannahagsmuna. Allri skynsemi er ítrekað kastað fyrir róða í þessu ríkisstjórnarsamstarfi því það þarf að keyra trúðalestina áfram, sama hvað.
Nýjasta málið er grásleppumálið svokallaða en fulltrúar ríkisstjórnarinnar í atvinnuveganefnd, sex talsins, afturkölluðu í gær beiðni atvinnuveganefndar um lagalega úttekt Lagastofnunar Háskóla Íslands á málinu – beiðni sem átti að varpa ljósi á áhrif málsins og grundvöll þess. Atvinnuveganefnd óskaði eftir álitinu þann 3.febrúar og lagðist enginn nefndarmaður gegn þeirri ákvörðun. Hvað breyttist á þessum 15 dögum sem liðnir eru?
Þess skal líka haldið til haga að þetta mál er þingmannamál Lilju Rafneyjar, formanns atvinnuveganefndar – ekki svokallað stjórnarmál sem unnið er í ráðuneyti. Þingmannamál hafa því ekki farið í gegnum nálarauga þess undirbúnings sem stjórnarfrumvörp þurfa að gera. Það er því sérstök ástæða til að staldra við og vinna málið vel í nefnd því um er að ræða stórtæka breytingu sem mun hafa áhrif.
En skynsemi, faglegheit og hagsmunir landsmanna mega sín lítils þegar halda þarf óstjórntækum Flokki fólksins góðum á ríkisstjórnarheimilinu.
Með þessu verklagi ríkisstjórnarflokkanna blasir við bótaskylda ríkissjóðs/skattgreiðenda, verra skipulag grásleppuveiða og verri afkoma af veiðunum. Það að taka grásleppuna út úr aflamarkskerfinu (kvóta) er afleit breyting til hins verra – þær verða þá ólympískar aftur sem skilar meiri meðafla, fleiri netum í sjó, verra skipulagi veiðanna, lokar á tækifæri fyrir útgerðir grásleppubáta að lengja tímabilið og sæta færis til að tryggja sér hærra verð fyrir afurðirnar o.s.frv. Gæðavottun afurða verður á sama tíma í uppnámi með ófyrirséðum afleiðingum.
Vinnubrögð ríkisstjórnarflokkanna eru nú, sem fyrr, gerræðisleg og forkastanleg með öllu. Málið dúkkaði upp á dagskrá gærdagsins, eins og skrattinn úr sauðarleggnum.
Þegar þessi pistill er skrifaður var málið ekki enn komið til umræðu, enda setur ákvörðun stjórnarflokkanna um að afturkalla þegar samþykkta beiðni um greiningu lagalegs grundvallar málsins, það í allt annað samhengi en áður var.
Áður blast við að málið var vanhugsað og illa útfært. Nú blasir við að staða Samfylkingar og Viðreisnar gagnvart Flokki fólksins virðist svo veik, að Inga Sæland hefur harkalegt hreðjatak á samstarfsflokkunum.
Steininn tók svo úr í gær með úrskurði forseta Alþingis, úrskurði sem mun virka sem 71.grein þingskaparlaga á nefndarstörf. Meira um það síðar.
Bergþór Ólason, alþingismaður.
Pistillinn birtist í Morgunblaðinu 18. febrúar, 2026.
