Miðflokkurinn vill standa vörð um störfin í Fjarðabyggð og skapa betri skilyrði fyrir ný tækifæri. Sterkt atvinnulíf er forsenda öflugs samfélags, traustrar þjónustu og framtíðar fyrir fjölskyldur í sveitarfélaginu.

Við viljum laða til Fjarðabyggðar bæði fólk og fyrirtæki með fyrirsjáanlegu rekstrarumhverfi, skilvirkri stjórnsýslu, góðum innviðum og jákvæðu viðmóti gagnvart uppbyggingu. Við viljum efla ferðaþjónustu, styrkja markaðssetningu sveitarfélagsins og nýta betur þau tækifæri sem felast í náttúru, menningu, atvinnulífi og samfélögum Fjarðabyggðar.

Miðflokkurinn vill einnig auka umsvif Mjóeyrarhafnar til inn- og útflutnings og styðja við hafnsækna starfsemi. Þar liggja mikil tækifæri til verðmætasköpunar, fjölbreyttari starfa og aukinnar samkeppnishæfni svæðisins.

Sjávarútvegur, fiskeldi og tengd starfsemi eru mikilvægir burðarásar í atvinnulífi Fjarðabyggðar. Miðflokkurinn vill standa vörð um þessar atvinnugreinar og tryggja að störf, tekjur og uppbygging skili sér til nærsamfélagsins.

Við viljum að Fjarðabyggð sé öflugt sveitarfélag fyrir fyrirtæki sem byggja á nýtingu hafsins, hafnarstarfsemi, þjónustu, flutningum og matvælaframleiðslu. Áherslan á að vera á stöðugleika, skynsamlegt regluverk og gott samstarf við atvinnulífið.

Virðing fyrir almannafé er eitt af grundvallaratriðum Miðflokksins. Sveitarfélagið fer með fjármuni íbúanna og ber skylda til að nýta þá af ábyrgð og ráðdeild. Við viljum lækka rekstrarkostnað fasteigna sveitarfélagsins, fara vel yfir rekstur og forgangsraða fjármunum í þágu grunnþjónustu.

Við viljum halda álögum og þjónustugjöldum í lágmarki, auka gagnsæi í rekstri sveitarfélagsins og tryggja að ákvarðanir séu teknar með hagsmuni íbúa að leiðarljósi. Skilvirkari stjórnsýsla og betri nýting fjármuna skilar sér í betri þjónustu og auknu trausti.

Fjarðabyggð á að vera samfélag þar sem fjölskyldur geta lifað góðu lífi. Við viljum endurskoða sumarlokanir og skráningardaga leikskóla Fjarðabyggðar með þarfir barna, foreldra og starfsfólks að leiðarljósi.

Við viljum tryggja öfluga grunnskóla, bæta stoðþjónustu við nemendur, foreldra og kennara og leggja áherslu á gott námsumhverfi, íslensku, læsi og vellíðan barna.

Miðflokkurinn vill efla ungmennastarf, félagsmiðstöðvar, skíðasvæðið okkar og aðstöðu barna og ungmenna til íþróttaiðkunar og hreyfingar. Við viljum að ungt fólk hafi fjölbreytt tækifæri til félagslífs, íþrótta, útivistar, menningar og þátttöku í samfélaginu.

Miðflokkurinn vill standa vörð um hjúkrunarrými í Fjarðabyggð og leita leiða til að fjölga þeim. Hreppaflutningar á öldruðum eru ekki ásættanleg niðurstaða. Eldra fólk á að geta búið áfram í sínu nærumhverfi, nálægt fjölskyldu, vinum og samfélaginu sem það hefur tekið þátt í að byggja upp.

Við viljum horfa til heildarþjónustu við eldri borgara. Þar skiptir öflug heimaþjónusta, félagsleg virkni, hreyfing, aðgengilegt húsnæði, þjónustuíbúðir og samhæfð þjónusta miklu máli. Eldri borgarar eiga að njóta virðingar, öryggis og þjónustu sem tekur mið af þörfum þeirra.

Miðflokkurinn vill beita sér fyrir öflugri heilbrigðisþjónustu í heimabyggð. Aðgengi að heilsugæslu, geðheilbrigðisþjónustu og forvörnum skiptir miklu máli fyrir lífsgæði íbúa á öllum aldri.

Við viljum leggja áherslu á að þjónustan sé sem næst fólkinu og að fjölskyldur, börn, ungmenni, eldri borgarar og þeir sem þurfa stuðning fái aðstoð tímanlega. Forvarnir, hreyfing, félagsleg þátttaka og gott aðgengi að þjónustu eru mikilvægir þættir í heilbrigðu samfélagi.

Góðar samgöngur eru forsenda öflugs sveitarfélags. Miðflokkurinn vill beita sér fyrir því að Suðurfjarðavegur verði settur í forgang og styðja við fyrirhugaða gerð Fjarðagangna. Betri samgöngur styrkja atvinnulíf, þjónustu, öryggi og tengsl milli byggðakjarna.

Við viljum efla almenningssamgöngur til þess að íbúar geti sótt sér afþreyingu, þjónustu og aðstöðu sem sveitarfélagið hefur upp á að bjóða, sérstaklega með áherslu á börn og ungmenni. Fólk á að eiga auðveldara með að sækja nám, vinnu, íþróttir, félagsstarf og þjónustu milli byggðakjarna.

Miðflokkurinn vill tryggja lóðaframboð í öllum byggðakjörnum og hafa það sýnilegt á kortavefsjá Fjarðabyggðar. Skýrar upplýsingar, gagnsæi og aðgengi skipta miklu máli fyrir fólk sem vill byggja, flytja heim eða setjast að í sveitarfélaginu.

Við viljum auka framboð fjölbreytts húsnæðis svo ungt fólk, fjölskyldur, eldri borgarar og nýir íbúar geti fundið húsnæði við hæfi. Búsetuskilyrði í dreifbýli þarf að efla sérstaklega með áherslu á innviði, þjónustu, atvinnu og tengingar.

Tryggir orkuinnviðir eru mikilvæg forsenda fyrir heimili, atvinnulíf og framtíðaruppbyggingu í Fjarðabyggð. Miðflokkurinn vill að orkuinnviðir styðji við vöxt sveitarfélagsins, hafnsækna starfsemi, iðnað, nýsköpun og búsetu í öllum byggðakjörnum.

Við viljum horfa til framtíðar með skynsamlegri uppbyggingu innviða sem styrkir samkeppnishæfni Fjarðabyggðar og tryggir að sveitarfélagið geti tekið á móti nýjum tækifærum.

Miðflokkurinn vill fegra umhverfi Fjarðabyggðar og tryggja að umgengni og ásýnd séu til fyrirmyndar. Snyrtilegt, aðlaðandi og vel hirt umhverfi eykur lífsgæði íbúa, styrkir ímynd sveitarfélagsins og gerir Fjarðabyggð meira aðlaðandi fyrir gesti, nýja íbúa og fyrirtæki.

Við viljum auka aðgengi íbúa að móttökustöðum sorps í Fjarðabyggð til að þjónusta betur þarfir íbúa. Flokkun og sorpmóttaka á að vera einföld, aðgengileg og í takt við daglegt líf fólks.